“Arts and Crafts” тақырыбында ашық сабақ

🔰2026 жылғы 9 ақпан күні №17 Иван Трубицын атындағы жалпы орта білім беретін мектеп-гимназиясында ағылшын тілі мұғалімі Кибраева Н.А. 10 “А” сыныбында “Arts and Crafts” тақырыбында ашық сабақ өткізді.
📌Сабақтың негізгі мақсаты – оқушыларды шығармашылыққа баулу, қолөнер түрлері туралы білімдерін кеңейту және практикалық жұмыс барысында ағылшын тілінде сөйлеу дағдыларын жетілдіру болды.
📍Сабақтың ең басты ерекшелігі – оқушылардың алған теориялық білімдерін бірден іс жүзінде қолдануы болды. Оқушылар шағын топтарға бөлініп, берілген материалдардан өз қолдарымен түрлі қолөнер бұйымдарын жасады. Жұмыс барысында олар ағылшын тілінде өзара ақылдасып, жасалу процесін сипаттап отырды.
Бұйымдар дайын болған соң, әр топ өз туындыларын ағылшын тілінде таныстырды. Оқушылар жасаған жұмыстарының маңызына, қолданылған техникалары мен материалдарына тоқталып, өз идеяларын еркін жеткізді. Мұғалім оқушыларға сұрақтар қойып, олардың шығармашылық жұмыстарын жан-жақты талқылауға ынталандырды.
Сабақ соңында оқушылар өз әсерлерімен бөлісті. Олар өнер туындыларын өз қолдарымен жасап, оны шетел тілінде қорғау сөздік қорды байытуға және өздеріне деген сенімділікті арттыруға үлкен септігін тигізгенін айтты.
Жалпы, сабақ өз мақсатына жетіп, оқушылар үшін өте тағылымды болды. Практикалық тапсырмалар мен шығармашылық жұмыс арқылы оқушылардың тақырыпты меңгеру деңгейі мен тілдік дағдылары айтарлықтай артты.